НОВИ САД – У Скупштини АП Войводини у Новим Садзе вчера отримана схадзка Координациї националних совитох (НС-ох) националних меншинох у Сербиї, хтору водзела предсидателька Координациї Ана Томанова Маканова, а присуствовали представителє векшини националних совитох. Спред Националного совиту Руснацох у роботи Координациї участвовали предсидатель Совиту Славко Рац и предсидатель Вивершного одбору Совиту Желько Ковач.
Координация розправяла о материялних и формалних елементох Акцийного плану за поглавє 23 у приступних прегваркох з Европску унию. Начални материял, хтори настал през роботу фахових групох на, и после предходней схадзки Координациї у Ковачици, охабени за евентуални суґестиї поєдинєчних националних совитох, а документ початком тижня будзе прешлїдзени роботному целу Министерства правди хторе, задлужене за План. Зоз становисками Координациї о обласци охрани меншинских правох хтори облапени у документу, буду упознати и компетентни державни органи, медзинародни институциї и цивилни сектор.
Тиж так, Координация предложела и своїх кандидатох за членох подґрупох Роботней ґрупи за виробок Акцийного плану, а хтори ше одноша на питаня вязани за национални меншини. З оглядом же членство подґрупох нє огранїчене, Национални совит Руснацох до подґрупи за статусни питаня, хтора розпатра и зоперанє дискриминациї и законодавни рамик, предложел подпредсидателя НС Миколу Шанту, до подґрупи за културну автономию члена НС Мирослава Кевеждия и предсидателя Вивершного одбору НС Желька Ковача, а до подґрупи за економске положенє, демократску партиципацию и медзинародни партнерства директора Завода за културу Руснацох Сергея Тамаша
Координация розпатрала и ситуацию коло приватизациї локалних медийох, як и предлоги статута и дїловнїка о роботи Координациї, односно можлївих моделох институционализованя того цела