За достоїнство людского єства

автор мгк
840 Опатрене

НОВИ САД – У „Студио М” у Новим Садзе, всоботу, 12. децембра, пейц Каритаси у Сербиї – Беоґрадского надвладичества, Суботицкого, Зренянинского и Сримского владичества и Каритас Апостолского еґзархату за грекокатолїкох, вєдно означели „Дзень Каритасу 2015” з назву „Мнє сце то зробели”.

Хор „Гармония”, з дириґентку Весну Кесич Крсманович и солистку Ану Римар шпивал духовни писнї, а директор Каритасу Сербиї, протоєрей ставрофор Владислав Варґа привитал присутних, медзи котрима були и представителє Сербскей православней церкви, протестантских церквох, исламскей заєднїци, Покраїнскей влади и Городу Нови Сад.

4-Karitas-02

– Винчуєм Каритасу на гуманосци и же указал же и у чежких часох чловек остава чловек, а Покраїнска влада сотрудзує у тих активносцох и помага кельо може – гварел з тей нагоди подпредсидатель Покраїнскей влади Мирослав Васин.

Парох новосадски о. Юлиян Рац презентовал медитацию з паповей були преглашеня позарядового ювилею Рока милосердия, а представителє пейцох владических Каритасох представели їх роботу. О дїялносци Каритасу нашого Еґзархату бешедовали вивершни директор Янко Катона и Соня Виславски, психолоґ у Центре за слуханє „Нїтка”.

4-Karitas-03

У полней церкви Мена Марийового, на Служби Божей по горватски и мадярски, хтору предводзел беоґрадски архиепископ монс. Станислав Хочевар, сослужели и священїки Еґзархату. У народним облєчиве, Наташа Шовш и Владимир Сендерак з Коцура, на Служби даровали череґи.

На концу, у своєй бешеди монс. Хочевар щиро подзековал шицким котри нєсебично участвую у роботи Каритасу, наглашуюци же нас вон шицких повязує и шири достоїнство людского єства.

4-Karitas-04

ПОВЯЗАНИ ТЕКСТИ