„Байка” з Руского Керестура орґанизовала дводньови початни курс виробку витражох котри водзел подобови уметнїк Александар М. Лукич зоз Суботици, а учели основни фази роботи зоз склом як цо резанє, викраванє, брушенє и основи тифани-технїки.
Здруженє женох „Байка” з Руского Керестура, за свойо членїци 19. и 20. авґуста орґанизовало дводньови початни курс виробку витражох, а витворела го як свой нови проєкт з меном „Слика у шветлу”.
Дводньови курс водзел подобови уметнїк Александар М. Лукич зоз Суботици, а жени учели основи тифани-технїки виробку витражох хтора подрозумює виробиц слику на склу.
На курсу участвовали седем жени хтори учели звладац основни фази роботи зоз склом як цо резанє, викраванє, брушенє и основи тифани-технїки.
– Гоч би за тот курс требало и кус вецей часу и пенєжи, видзим же жени схопни, же ше ошлєбодзели од страху робиц зоз склом цо найважнєйше, и тераз лєм треба часу же би ше увежбало тоти схопносци. Прейдземе и тифани-технїку у хторей ше витражи склада з бакарнима фолиями, та маме упознац и даскельо технолоґийни процеси – виявел Александар Лукич.
Предсидателька Здруженя „Байка” Славица Катона о тим проєкту гвари.
– Завиши яке будзе интересованє при женох, бо на початку ше шицки досц обавали, поправдзе, и алат и материял досц драги. Но, робота барз интересантна, та думам же и тото знанє нє опущиме и же ше хтошка прилапи робиц и тото.
Як дознаваме од членїци „Байки” Наталиї Емейди за тот проєкт конкуровали як партнере Здруженю ремеселнїкох и приватних поднїмательох з Руского Керестура.
– Од Покраїнского секретарияту за привреду зме за проєкт достали 40 000 динари, а тота сума достаточна лєм же бизме звладали основи тей схопносци. Тифани-технїка оможлївює и виробок и прикрашованє предметох за каждодньове хаснованє як цо лампи, годзинки и подобне, цо зме мали нагоди видзиц, и цо барз красне. Мали зме идею у даякей другей фази проєкту применїц тото знанє и у прикрашованю виробкох наших ремеселнїкох – гвари Емейдийова.
УМЕТНЇК НА СКЛУ
Уметнїк Александар М. Лукич, по мацери Руснак зоз Шиду, влонї участвовал на Керестурским сайме дзе витворел контакт и з Байку. Припознати є уметнїк на склу, а од 2008. року член Здруженя применєней уметносци и дизайну Войводини (УПИДИВ), секциї за применєне малярство, обласц витражи. Рускей явносци ше пред даскельома роками представел зоз самостойну виставу у рамикох Фестивалу „Ружова заградка”, а його роботи обявени и у нашим часопису „Шветлосц”.