Зоз Кракова до Керестура на бал

автор маз
1.8k Опатрене

На тогорочним Младежским балу у Руским Керестуре, хтори бул концом януара, було и младих зоз других жемох, а єдна з нїх була и Юстина Галущак з Кракова, з Польскей. Вона до валалу пришла сама праве пре Бал, на поволанку Себастияна Нярадия, хторого упознала на Фейсбуку, як и прето же би упознала нашу жем, сербски язик хтори студира, алє и дознала вецей о Руснацох у Сербиї.

Юстина студира у Кракове сербску филолоґию на Яґелонским универзитету. Тераз є други рок, а сербски язик уж наисце добре звладала. Виглєдуюци свойо коренї, Юстина вичитує кнїжки о Русинох у швеце, та так дознала и о нас, Руснацох у Сербиї.

ФЕЙСБУК ЄЙ ОТВОРЕЛ ДЗВЕРИ

Же Фейсбук може буц хасновити, пре можлївосц швидкого и лєгкого доходзеня до информацийох, алє и прето же отвера дзвери за нови познанства и искуства, шведочи и Юстинова приповедка.

– То дакус шмишна приповедка. Кед сом на интернету глєдала информациї о Русинох, у ґрупи „Carpatho-Rusyns Everywhere” сом видзела же Себастиян Няради и я маме єдну заєднїцку пайташку. Прейґ його профилу сом похопела же ма вязи з Руснацами у Сербиї. Послала сом му порученє же нє знам вельо о вас, а любела бим знац, та бим сцела кед би ми повед дацо вецей. Наисце сом нє думала же ше то закончи так же аж и придзем до Керестура – виприповедала нам Юстина ютре дзень после Младежского балу, пре хтори, насампредз, и пришла до Сербиї и, як гварела, нє побановала.

– Кед ме Себастиян после даскельо мешацох як зме ше упознали на интернету поволал же бим пришла на Бал, пристала сом, алє сом наисце нє знала цо обчековац и цо вообще подрозумює Младежски бал. Медзитим, можем повесц же ми нїч нє було нєзвичайне. Велї шпиванки хтори ше грало ми були познати, бо сом танцовала у фолклорней ґрупи у Кракове, дзе зме мали танци и шпиванки и зоз Словацкей, а тоти шпиванки подобни з вашима. Нє побановала сом же сом пришла, бо сом дознала вельо нового и упознала нових пайташох, нє лєм оталь, алє и з Горватскей – гварела Юстина.

ДРУГИРАЗ У СЕРБИЇ

Юстина Галущак до Сербиї на керестурски Бал пришла сама.

– Дакус сом ше бала як шицко випаднє кед сом приходзела, а и путованє длуго тирва, алє по тим шицким цо сом чула и пречитала о Русинох, предпоставяла сом же и ту людзе за приятельство, друженє, помаганє и добри живот. Мило ми же сом була праве у Себастияна, понеже його фамелия наисце интересантна, вельо франтую и то ме барз одушевело – додала вона.

Юстина вибрала студирац праве сербски язик пре фолклорну ґрупу „Мали Славянки” у хторей 12 роки була член и з хтору вельо путовала, та, медзи иншим, уж раз була и у Сербиї. Тераз є член балканскей фолклорней ґрупи „Иґлика”.

– З першу ґрупу зме вельо путовали по Европи, та зме єдного року були и у Вершцу на фестивалу. Нє було ми барз чежко научиц сербски язик, бо ми даєдни слова були познати з дзецинства, кед зме каждого лєта у баби и дїда на валалє слухали з братом русински язик котри блїзки сербскому. Думам же тоти язики маю досц подобносци – визначела Юстина и за конєц додала же би любела кед би ше млади Русини зоз шицких жемох дзе жию могли стретац и дружиц ше.

Foto 2

ПОВЯЗАНИ ТЕКСТИ