СЕРБИЯ – Пре лєпши економски условия, за остатнї 25 роки зоз жемох восточней Европи пошли коло 20 милиони гражданє, углавним млади и образовани людзе, указало вилєдованє Медзинародного монетарного фонду (ММФ). Мотивация за одход то лєпши роботи, векши плаци, а найвецей ше виселює високообразовани кадер – лїкаре, архитекти, инженєре…
И нашо гражданє доприноша розвою богатих заходних жемох, а Сербиї чежко затримац младих. Пред 20 роками зоз Сербиї одходзело коло два одсто жительох, а тераз тот процент вецей як 15 одсто. На основи формалних податкох, оценете же Сербию рочнє напуща 32 000 школовани млади людзе, з чиїм школованьом Сербия швету „подаровала” вецей як 10 милиярди еври.
У шицких жемох восточней Европи висельованє младих погоршує тренд росту проценту старшей популациї, цо спричинює векши розходи на пензийни даваня у одношеню на бруто дружтвени продукт.
Центер за стратеґийни проєкти винєсол податок же спомедзи 144 державох Сербия на 141. месце по капацитету за затримованє талантованих людзох, а аж на 143. месце по можлївосцох за прицагованє талантох.