КОЦУР – У Коцуре нєшка, 15. юлия, почина дводньови Фестивал фолклору Руснацох „Коцурска жатва”, а почнє з Литературним вечаром, на хторим будзе представени кратши антолоґийни вибор рускей уметнїцкей поезиї, од єй початкох по нєшка.
Поезию буду рецитовац младши и старши рецитаторе и ґлумци з Коцура, Вербасу и Руского Керестура, а дзепоєдни авторе буду представени и прейґ окремних прилогох, прейґ видео-биму.
Програма будзе преткана з музичнима точками, будзе отримана у лєтнєй учальнї ОШ „Братство єдинство”, а почнє на 21 годзин.
После Литературного вечару, опрез Дому култури (коло 22 г.) будзе програма за младих „Тамбуранє”.
На ютре, 16. юлия, у рамикох „Жатви” у физкултурней сали Основней школи буду вецей провадзаци програми, хтори почню на 18,30 годзин, а на вечар, на лєтнєй бини Дому култури будзе фестивалска часц, на хторей участвую танєчни ансамбли з наших местох.
Фестивалска часц ютре почнє на 20,30 годзин, а участвую и госци з иножемства – Фолклорни ансамбл „Кечера” з Якубянох, зоз Словацкей.
После соботовей вечаршей програми, „Коцурска жатва” будзе закончена з традицийним „Торба-балом”.