РУСКИ КЕРЕСТУР – Вчера вечар у полней Велькей сали Дому култури з цаловечаршим концертом ше успишно представел Українски ансамбл „Євшан” зоз Саскатуну, з Канади, як єден з найстарших аматерских ансамблох у тей жеми, а водзи го визначни фаховец-хореоґраф Виталий Сокочанин, родом з України.
По приходу до Будапешту, наступ у Керестуре им бул перши на їх турнеї по жемох Балкану, дзе буду наступац у городох Сербиї, Босни и Герцеґовини, Горватскей и на остатку у Любляни, у Словениї.
Публика, у хторей окрем Керестурцох були и нащивителє зоз сушедних местох, уживала и з моцнима аплаузами наградзовала вше атрактивни українски танци, як цо „Привитни танєц”, „Козачок”, „Волиньски танєц”, на законченю „Гопак”, а одтанцовали и „Циґански” и „Вояцки” танци. Шицки танци танєчнїки виведли у наисце прекрасним народним облєчиве, як поведзене, шитим за нїх у України.
Публику на концу привитал и хореоґраф Сокочанин, а у мено домашнїх, директор Дому култури Йоаким Рац подзековал госцом на красним наступу и придал дарунки на памятку.
У конферанси визначели же праве вчера, 1. юлия, бул Дзень Канади, та госци на самим концу програми одшпивали канадску гимну, а понеже пестую културу України, одшпивали и українску гимну.
По концерту, танєчнїки у народним облєчиве вишли опрез Дому култури и публики дзелєли мали дарунки, фотоґрафовали ше з нїма и упознавали. Госцуюци ансамбл потим нащивел и катедралну церкву св. оца Миколая, дзе их парох о. Михайло Малацко кратко упознал з историю нашей Церкви и Руснацох на тих просторох.
