РУСКИ КЕРЕСТУР – У орґанизациї Месней заєднїци Руски Керестур, а на поволанку домашнїх, фодбалере „Русину” з Руского Керестура од 3. по 5. юлий госцовали у Свиднїку, дзе у рамикох Дньох того места отримана и преслава 90-рочнїци домашнього фодбалского клубу, нєшка з меном „Друстав”. На Дньох Свиднїку з фодбалерами були и предсидатель Совиту Месней заєднїци Руски Керестур Владимир Олеяр и привреднїк Елемир Рац.
Як Рутенпрес дознава од тренера керестурских фодбалерох Златка Саянковича, всоботу, 5. юлия, у рамикох означованя спомнутого ювилею отримани турнир у малим фодбалє, на хторим мишана екипа фодбалерох „Русину” и домашнїх освоєла 5. место спомедзи 8 екипох.
Исти дзень пополадню отримане змаганє у вельким фодбалє, у хторим ФК „Друстав” победзел „Русин” зоз 3:2, а ґоли за „Русин” дали Милан Дюрич и Алек Чизмар. У змаганю ветеранох „Друставу” и репрезентациї ветеранох Словацкей домашнї страцели зоз 6:1.
Предсидатель Совиту Месней заєднїци Владимир Олеяр делеґацию Свиднїку, на чолє з городоначлнїком Яном Голодняком, поволал на Днї керестурскей паприґи, а Олеяр и Рац були и у Медзилабороцох, дзе тиж догварене же чолнїки того места приду на тогорочни Днї паприґи.
Попри спомнутих контактох, у Свиднїку и Медзилаборцох бешедоване и о предлужованю дальшого медзисобного сотруднїцтва и нащивох у обласци култури и спорту.
