СРИМСКА МИТРОВИЦА – Вчера, на Вознесениє Господнє по юлиянским календаре у грекокатолїцкей парохиї у Сримскей Митровици преславене храмове швето – Кирбай.
Архиєрейску Службу Божу предводзел апостолски еґзарх за грекокатолїкох у Сербиї владика Георгий Джуджар, а сослужели аж дзешец священїки з нашого Еґзархату, Крижевского владичества у Горватскей и госци.
Шветочну Кирбайску Службу з владиком кир Георгийом служели о. Михайло Режак зоз Шиду, о. Дарко Рац з Бачинцох, о. Петро Дудка з Индїї, о. Яким Симунович з Миклошевцох, о. Владимир Маґоч з Вуковару, о. Владимир Седлак з Петровцох, о. Александар Хмиль зоз Славонского Броду, о. Никола Ступяк з Канїжи, римокатолїцки священїк о. Едуард Шпанович зоз Сримскей Митровици, а шицких привитал домашнї парох о. Владислав Варґа.
На Служби було надосц парохиянох и їх госцох, медзи нїма и заменїк предсидателя Националного совиту Руснацох Йовґен Мудри и подпредсидатель НС Микола Шанта, а закончена є з традицийним обходом коло церкви.
Кирбай у Митровици преславени и у знаку 130-рочнїци снованя парохиї и 110-рочнїци вибудови церкви, хтору ше тераз обновює, так же тирваю будовательни роботи. Централна преслава спомнутих ювилейох будзе на єшень.