МИКЛОШЕВЦИ – На швето Рождества Богородици вчера у Миклошевцох шветочно преславени Кирбай, хтори возвелїчал и владика крижевски, кир Никола Кекич.
У грекокатолїцкей церкви, хтора ноши мено Мацери Божей, отримани два Служби – Ранша на 8, док на 11 годзин Архиєрейску Службу Божу служел владика Кекич, котрому то була треца нащива Миклошевцом з нагоди Кирбаю.
З владиком сослужели парох вуковарски и раєвоселски о. Владимир Маґоч, парох петровски о. Владимир Седлак, котри читал Євангелию, о. Стєпан Маросавац з Дякова, та домашнї парох и викар славонско-сримски о. Яким Симунович.
На Архиєрейскей Служби сослужели и священїки з Апостолского еґзархату за грекокатолїкох у Сербиї – парох шидски и декан сримски о. Михайло Режак, парох у Беркасове и Бикич Долу о. Владимир Еделински Миколка и декан беоґрадски и парох у Сримскей Митровици о. Владислав Варґа. Вєдно з парохиянами, Службу шпивали шестри Василиянки з Вуковару и Осєку.
У казанї по руски владика бешедовал о духовних вредносцох котри ше, нажаль, у нєшкайшим способе живота вше менєй почитує. Прето здогаднул на Марийов приклад пошвеценосци Богу и визначел же би вирни модлєли од нєй помоц, витирвалосц и потїху.
На концу Служби о. Симунович подзековал владикови, як и шицким священїком же пришли преславиц Кирбай з вирнима, як и їх госцами з Петровцох, Вуковару, Осиєку, Раєвого Села, Нового Саду, Беркасова, Шиду.
Потим бул одпусни обход коло церкви з читаньом штирох Євангелийох на шицки бокох швета, хторе закончене з Многолїтствийом.