ДЮРДЬОВ – Всоботу, 26. децембра, у КУД „Тарас Шевченко” у Дюрдьове отримана промоция компакт-диску (CD) з Музичного вечару „Тал”, хтори у Дружтве пред роком отримани з нагоди 60-рочнїци народзеня познатого музичара, композитора и музичного педаґоґа Михала Лїкара з Дюрдьова. Материял за компак-диск пририхтал дюрдьовчан Момчило Станкович.
У рамикох програми з нагоди промоциї CD Дзецинска шпивацка ґрупа, соло-шпивач Ваня Кухар и Хлопска шпивацка ґрупа, з провадзеньом тамбурового оркестру одшпивали даскельо шпиванки хтори компоновал Михал Лїкар.
З нагоди ювилейного рока од снованя Дружтва предсидатель КУД Микола Кухар по промоциї шицким членом подаровал компкат-диски „Шпиванки” Хлопскей шпивацкей ґрупи (2011-2014) и инструментали Тамбурового оркестру (2010-2014).
Дзень пред тим, пияток вечар, на схадзки Управного одбору КУД Владимир Балоґ з Дюрдьова Дружтву придал ґитару, як дарунок од Мирослава Туринского зоз Сримскей Каменїци.