Конституовани Пододбор за демоґрафию

автор тах
966 Опатрене

ВЕРБАС – Вчера, 14. новембра, у просторийох КПД „Карпати” у Вербаше отримана конститутивна схадзка Пододбору за демоґрафию Одбору за службене хаснованє язика и писма Националного совиту (НС) Руснацох, а за предсидателя Пододбору вибрани Борислав Сакач з Нового Саду.

На схадзки присуствовали пейц з шейсц членох Пододбору, як и подпредсидатель НС Микола Шанта, предсидатель Вивершного одбору НС Желько Ковач и секретар Совиту Таня Арва Планчак. На схадзки прилапени и Дїловнїк о роботи и утвердзени цилї и плани роботи Пододбору.

Як визначене, Пододбор за демоґрафию ше будзе старац о наймладших у нашей заєднїци, а по шлїдуюцу схадзку у планє виробок календару подїйох значних за функционованє того цела, як и платформох за предшколски, школски и штредньошколски дзеци. Тиж поведзене же ше почнє водзиц статистику народзеня дзецох у рускей заєднїци, а як єден зоз способох финансованя водзеня демоґрафскей политики спомнуте и снованє окремного фонду.

На вчерайшей схадзки члени Пододбору розподзелєли и средства хтори НС опредзелєл за його потреби, та векша часц пенєжу неменєна за дзецински активносци у Руским културним центре у Новим Садзе, а менша будзе вихаснована за финансованє винчованкох за новонародзени дзеци у нашей заєднїци у тим року.

ПОВЯЗАНИ ТЕКСТИ