Work&Travel то програма котра остатнї роки нательо популарна же практично анї нє потребне вельо о нєй толковац. Робота у Зєдинєних Америцких Державох прицагує велїх, а нагода путовац зоз заробеного пенєжу допринєсла же би вше векше число студентох свойо лєто препровадзело у Америки.
Право участвовац на програми Work&Travel маю порядни студенти на факултетох по 30 роки. Понеже у чаше у котрим жиєме єден з найвекших проблемох пенєж, а за шицки процедури и орґанизованє тей драги треба уложиц вецей як два тисячи евра. Окрем пенєжу, треба найсц аґенцию котра обезпечує найлєпши условия. Менши туристични места и вароши нєпреривно маю потреби за роботну моцу, та орґанизаторе програми Work&Travel и препоручую таки локациї.
Без огляду на дестинацию, студенти зоз цалого швета можу виберац роботу, конкретну державу, та и место дзе буду пребувац и робиц, а найчастейше то роботи у готелох, ресторанох, забавних и националних паркох, казинох, базенох, маркетох итд.
Векшина розгваркох за роботу ше отримує прейґ Скайпу, медзитим доставанє роботи нє ґарантує одход, понеже главни крочай прешвечиц интервюистох же вам факултет значни и же ше плануєце врациц и закончиц студиї.
ДОЖИЛА ТРЕШЕНЯ ЖЕМИ, ЦУНАМИ И СТРЕТЛА МЕДВЕДЗА
Наташа Гайдук зоз Руского Керестура, студентка на Педаґоґийним факултету у Зомборе, на програми Work&Travel участвує уж други раз – влонї була на Аляски, а тераз є у Ню Гемпширу, у Сиверним Вудстоку.
– Моя перша робота була у готелу „Гилтон”, хтори ма коло 600 хижи, а робела сом як пораячка. Нє було лєгко, алє, заш лєм, интересантно. Було нас коло 30-еро зоз Балкану и крашнє зме ше дружели. Потим сом робела у ресторану, дзе сом була помоцнїца келнера. Понеже була добра сезона, нєпреривно сом робела и мала сом вельо прейґчасово годзини, та сом швидко врацела уложени пенєж, а ґу тому и заробела за себе. После штирох мешацох роботи, сцигол и пияти мешац визи, котри мож хасновац за путованє. Опредзелєла сом ше за одпочивок на Гавайох, пошла сом до места Оаху у месту Хонолулу и були то шейсц прекрасни днї котри нїґда нє забудзем. Потим сом пошла ище штири днї до Нюйорку
Сандра (перша зоз правого боку) зоз пайташками у месце Бутбей Гарбор
и назад дому – здогадує ше Наташа.
Тераз є на штвартим року факултета, та вихасновала можлївосц пойсц ище раз. После сиверу, того року ше опредзелєла пойсц на восточне побрежє Америки, до Ню Гемпширу.
– Затераз сом задовольна и плануєм и того року путовац, обисц Маями и Бостон. Окрем упознаваня людзох рижних нацийох, коштованя нових єдзеньох, заробеного пенєжу и усовершованя анґлийского язика, на Аляски сом „прежила” три трешеня жеми, на Гавайох єден цунами, а у Ню Гемпширу ше на драже стретла „оч до оч” зоз медведзом. То було цошка нєкаждодньове, страшне, а заш – цикаве. Можем повесц же тота програма єдно вельке позитивне искуство и вшелїяк плануєм пойсц ознова – гвари Наташа.
Мале число тих котри на тоту авантуру нє жадаю пойсц и други раз, а познате и же млади котри жадаю пойсц, шицко поробя же би то витворели – калкулую кельо испити попокладаю на остатнїм року же би нє дипломовали скорей як достаню визу. Дзепоєдни ше аж и уписую на факултет и покладаю испити же би здобули условия пойсц до Америки робиц и путовац. Же би заробели цо вецей, велї студенти робя и по два роботи – єдна им главна, а друга дополнює буджет.
МОЖ ДОСТАЦ РОБОТУ И У ФАХУ
Познанства котри здобуду у Америки, студенти длуго паметаю, а прейґ сучасних технолоґийох маю можлївосц отримовац контакт. Єст и таких котри ше врацаю до истого места, дзе уж маю познатих. Сандра Дудаш зоз Руского Керестура влонї пошла до места Бутбей Гарбор у держави Мейн, а того року ше опредзелєла врациц.
– Кед сом першираз пошла, нє очековала сом бог зна цо, а достала вельо вецей. Циль ми бул видзиц як функционує живот у Америки и на концу врациц уложени пенєж. Похопела же ше ту намаганє наисце виплаци. Влонї сом за пейц мешаци робела вецей роботи, а того року сом ше врацела до истого места и достала роботу у фаху – робим у рахунководстве за три готели и ресторани, так же нє мам потреби робиц ище дацо.
Ту иншака култура, обичаї, менталитет и стандард, а шицко тото дава можлївосц иншакого попатрунку на живот. Нє значи же ше шицким будзе пачиц, алє ше дому враца зоз вельким искуством – на першим месце знаходзенє у новим штредку, самостойни живот и хаснованє странского язика. Препоручела бим шицким котри маю нагоду пойсц, най иду, прето же здобуду вельке животне искуство – гвари Сандра.
Нашо собешеднїци ше складаю же биванє и робота у Америки окремне искуство, медзитим, же би ше вицагло найвецей з програми, значне буц упарти и отворени за нови искуства и познанства.
