НОВИ САД/КУЛА – Делеґация руководства кулского ФК „Гайдук 1912” у составе – предсидатель клубу Далибор Кркович, його совитнїк Предраґ Раїч, директор Желько Ачански, шеф фахового штабу Желько Рачич и предсидатель Општини Кула Дамян Милянич, вовторок 8. децембра нащивели руководство ФК „Войводина”, дзе на заєднїцкей схадзки утвердзени напрямки будуцого сотруднїцтва.
Спред ФК Войводина, у шветочней сали ФЦ „Вуядин Бошков”, госцох зоз Кули дочекали предсидатель Драґолюб Самарджич, член УО Петар Дюрдєв, директор младежскей школи „Илия Пантелич” Душко Ґруїч и секретар Александар Влашкалич.
Схадзка иницирована пре дакедишнє добре сотруднїцтво двох клубох, зоз часох ище док ше обидва змагали у истей дакедишнєй Супер лиґи, кед и кулски Гайдук глашел за єден з лєпших фодбалских клубох, а пре же обнавянє сотруднїцтва на хасен обидвох клубох.
На стретнуцу бешедоване о можлївим сотруднїцтве насампредз кед слово о младших катеґорийох, о витваряню лєпших условийох за напредованє бавячох.