КОЦУР – Културно-просвитне дружтво (КПД) „ДОК” всоботу, 14, фебруара, з нагоди дньох Св. Валентина и Св. Трифуна орґанизовало литературни вечар, винови вечар, а потим и рочну Скупштину.
Програма почала у валалскей библиотеки з представяном нового, 18. числа часопису „Ерато над Коцуром” у рамикох Литературного вечара. На Литературним вечаре афирмовани и нєафирмовани поетове читали любовну поезию, а з писню о Валентинову на програми участвовали и школяре 4. класи ОШ „Братство-єдинство”. По законченю Литературного вечара, у просторийох Дому култури служени три файти вина.
Понеже дотерашньому руководительству КПД „ДОК” вишол мандат, на концу отримана и рочна, виберанкова Скупштина, на хторей за предсидателя Дружтва знова вибрани проф. др. Михайло Фейса, а место покойного Владимира Сабодайка, за предсидательку Скупштини КПД вибрана Мария Горняк. Одлучене же место дотерашнїх пейц, Дружтво од тераз будзе мац єденац членох Управного одбору.