ВЕРБАС – Дотерашнї заменїк предсидателя Општини Вербас Милан Ґлушац штварток, 14. юлия, вибрани за предсидателя Општини, после задзекованя др Бранислава Кажича на тоту функцию. Як на схадзки Скупштини општини (СО) Вербас потолковал Кажич, задзекованє дал прето же би з тим поцагом прицагнул увагу Влади Сербиї на проблеми з хторима ше зочує вербаска општина и же, як гварел, нє видзел на хтори способ ше ма предлужиц занїмац з политку, а же би то дало резултати. И Кажич и Ґлушац члени Сербскей напредней странки, владаюцей у локалним парламенту.
Милан Ґлушац (1977), дипл. економиста, за предсидателя Општини вибрани з 26 гласами одборнїкох, а за його заменїка вибрани Ненад Велицки, дотерашнї член Дмократскей странки (ДС) и предсидатель Општинского одбору ДС, а котри прешол до СНС. На схадзки за членох Општинскей ради вибрани Йован Ковачевич, Йована Вуйтович, Данило Мараш, Єлена Збучнович, Мариян Миянович, Душко Чутило и Ґоран Пейович.
Попри тих вельких кадрових пременкох, штварткову схадзку СО Вербас означел и протест роботнїкох занятих у Явним подприємстве (ЯП) за превоз путнїкох „Вербас”, котри пред початком схадзки парковали автобуси опрез будинку општини. Понеже им то було одобрене, свойо проблеми, насампредз же уж 10 мешаци нє доставаю плацу, винєсли одборнїком на схадзки СО.
Як пише веб-портал Општини Вербас, на концу схадзки СО задзекованє на длужносц директора спомнутого подприємства (за цо є вибрани у марцу того року) нєсподзивано дал Велько Ковачевич, так же СО за окончователя длужносци директора ЯП за превоз путнїкох „Вербас” меновала Сашу Ковачевича.
Турбулентна схадзка СО Вербас була и претаргована, а медзи иншим, одборнїки на нєй прилапели и закончуюци рахунок општинского буджету за прешли рок, вименку Одлуки о максималним чишлє занятих на нєодредзени час у явним секторе у општини Вербас, так же то тераз 827 занятих, а прилапени и звити о роботи за прешли рок вецей ЯКП и установох.
