Єшеньска часц першенства у Медзиопштинскей фодбалскей лиґи Срим, ґрупа Заход оддавно закончена, а остава видзиц цо през жиму пременїц и злєпшац же би у предлуженю сезони на яр, пласман бул ище лєпши. Так роздумую у ОФК „Бикич” хтори єшень закончел на пиятим месце на таблїчки од 16 екипох з того подруча заходного Сриму.
На початку розгварки Далибор Гнатко, предсидатель бикичских фодбалерох, гвари же вшелїяк же пласман могол буц лєпши як цо витворени. Но, лабда округла, а кед будзе щесца у ярнєй часци мож очековац лєпши резултати.
– Гамовали нас калїченя фодбалерох цо ше одражовало на квалитет бавеня стретнуцох и на концу зме завжали пияте место цо и добре од 16 екипох у лиґи, бо значи же зме у верху таблїчки. Медзитим, думам же зме годни и лєпше и же би реални пласман у ярнєй часци було єдно з перших трох местох. Остава нам помоцнїц бавяцки кадер през жиму зоз двома-трома фодбалерами, вец тренирац добре и буц порихтани за предлуженє сезони – гвари Далибор Гнатко, и додава же кадетски тим у своєй катеґориї тиж освоєл пияте место.
Далибор Гнатко
Предсидатель Клуба надпомнул же тот рок вихасновани на ушореню терена з оглядом же до Бикичу госцовац приходза екипи и зоз других городох и валалох Сриму. Збудована трибина зоз 110 местами зоз шедзисками и трибина закрита. Ушорене и зогриванє у зоблєкальнї, а остава покласц цегелки до бифеу (ресторану) хтори роби кед Бикичанє домашнї, так же публика ма можлївосц и ошвижиц ше кед придзе патриц змаганє.
Же би клуб функционовал потребни и финансийни средства. Гнатко нам гвари же од локалней самоуправи достати 300.000 динари, помага и Месна заєднїци Бикич, як и спонзоре Янко Романяк, Звонко Гнатко, потим и сам предсидатель клуба Далибор Гнатко, Мирослав Нонкович, пекарня „Лепинїца”, як и месарня „Янїч”, односно Борислав Янїч.
Же пласман могол буц лєпши, склада ше и тренер Славко Дупаль, хтори тиж визначує же ше раховало завжац єдно з перших трох местох на таблїчки. Алє…
– Було досц стретнуца хтори зме бавели нєришено и то на домашнїм терену, а могли зме победзиц, так зме раховали. Вец ше случовало же нам хибели єдни з найлєпших бавячох як цо Момчилович хтори одсустововал пре роботни обовязки, а тиж зме мали и покалїчених фодбалерох хтори нє могли бавиц, як цо шпиц бавяч Добрич. Рахуєме же през жиму змоцнїме тим зоз голєм трома фодбалерами. По єдного у одбрани, штредку и у нападу. Тиж кед почню пририхтованя за ярню сезону, треба вредно тренирац и добре рушиц на самим початку ярнєй сезони – гвари тренер Славко Дупаль.
СТАНДАРДНИ БАВЯЧЕ
Тренер Славко Дупаль нам предстaвел и тим хтори витворел пласман за пияте место у полусезони. Ґолман Ґоран Стоядинович, потим Боян Басрак, Миленко Васич, Дражен Момчилович, Иґор Дюрдєвич, Ґоран Момчилович, Душко Девич, Марко Йовичилич, Асмир Байрами, Тихомир Милетич, Деян Добрич, Дьордє Кляїч, Тодор Кнежевич, Милош Босанац, Слободан Недич, Вукашин Радмановац и Желько Иштук.