Файта животинї:

Патулясти заячок „лєвова глава”.

Як мено твойому любимцови? Хто му вибрал мено?

Мойому заячкови мено Пуфна. Кед сом го достала за родзени дзень, пред скоро двома роками, бул барз мандушки, округли и мегки. Прето мама и я надумали же бизме го наволали Пуфна.

Кельо ма роки:

Ма скоро два роки.

Як вон випатра? Можеш го описац?

Пуфна шивей фарби. Ма густу и мегучку шерсц. Ушка єй вше спущени. Часто ю штригаме коло очох же би добре видзела. Чешем ю скоро кажди дзень. Пуфна барз активна, ма мали, алє швидко ноги.

Цо твой любимец найволї робиц?

Найволї бежац. Тато єй направел хижку, ма аж и терасу, алє вона найволї кед ю пущиме до двора и кед може швидко бежац. Лєм през ноц є у хижки, а през дзень є пущена. Часто ше бави и зоз псом Бинґом. Теди су барз шмишни. Люби и огризац траву, алє люби єсц и квеца.

Зоз чим го кармиш?

Пуфна люби єсц овоц, желєняву и житарки. Найволї єсц яблука и банани. През лєто барз ше єй пачели ягоди.

Як ше ти зоз нїм бавиш?

Кед красна хвиля, найволїм буц зоз заячком у трамболини. Я шедзим, а вон бега доокола. Барз ше люби гласкац, а найволї кед го ношим на рукох як бебу. Часто ми и зашпи на рукох.

Можеш нам виприповедац даяку шмишну ситуацию зоз нїм?

Барз є шмишни кед ше бави зоз псом. Пес на ньго барз меркує и углавном ше оганяю. Дакеди випатраю єк кед би ше бавели на джмурки. Заяц бежи барз швидко. И часто, кед подумаце же сце пойсц на право, вон нагло скруци на лїво. Кед є барз радосни и розбавени, обраца салто у воздуху. Раз ше случело же од пса украднул косц и бежал зоз ню по цалим дворе.

Чи би ши препоручела и другим дзецом же би себе набавели такого любимца и прецо?

Препоручуєм шицким дзецом же би мали заячка. Вони барз мили животинї. Любя дружтво, любя ше гласкац и бавиц.

Маш дома ище даяки животинї?

Мам вельо животинї – пса, мачку, шейсц папаґаї, а маме и вельо домашнї заяци и заячата.