Музика часц мойого живота

автор Сенка Надь
1.1k Опатрене

Традицийну кошарку червених ружох и стилизовану дзивоцку ладу на тогорочним Фестивалу „Червена ружа” освоєла млада шпивачка Йована Ноґавица з Руского Керестура. Гоч на змаганю на найкрасши глас участвовали велї квалитетни вокали, по думаню жирия Йована ше найбаржей визначела, зоз интерпретованьом шпиванки „Весела дзивка”.

Йована того року закончела основну школу и опредзелєла ше остац у Руским Керестуре, та ше уписала до ґимназиї у Основней и штреднєй школи зоз домом школярох „Петро Кузмяк”. Одмалючка є активна у велїх обласцох: спорту, музики, танцу, з часу на час пише до нашого часопису за младих МАК, а була и  барз блїзко же би достала припознанє и награду за школярку ґенерациї. Шпива у Дзивоцкей ґрупи керестурского Дома култури и школским хору, а як нам виволала, банує же нє мала нагоду научиц грац на виолини понеже нєт напрям за тот инструмент у керестурским оддзелєню музичней школи.

– Одмалючка сом любела музику. Уж у предшколским возросту сом почала шпивац у хору на „Пупчу”, потим сом дакус направела паузу и вец сом од трецей класи предлужела шпивац, а того року сом прешла ґу старшим, на „Червену ружу”. Покус нєзвичайне за мою ґенерацию же нє любим странски писнї, а гоч шпивам у нашим хору, приватно нє слухам таку музику – гвари Йована.

Як гвари, на „Червеней ружи” нє плановала участвовац, алє то випадло цалком спонтано, та анї нє було вельо часу за рихтанє. Того року на змаганю за найкрасши глас участвовали велї млади дзивки и то праве зоз Йовановей ґенерациї.

– Мойо пайташки и я шпивали на тогорочним Рочним концерту Дома култури и после того Юлиян Рамач Чамо препомнул же бизме могли шпивац и на „Ружи”. Так ше пайташки почали интересовац, та нагварели и мнє – гвари Йована.

IMG_9334

Гоч участвовала нєплановано и спонтано, по думаню жирия, єй глас ше указал як найкрасши и, попри тим же писня „Весела дзивка” нє у складзе зоз роками 15-рочней дзивки, випадло же тота писня барз одвитує єй фарби гласу.

– Щиро, нєсподзивала сом ше же сом освоєла награду за найкрасши дзивоцки глас. Гоч вшелїяк мам слуха, нє сцела сом участвовац у змаганю прето же сом думала же нє мам таки глас же бим победзела. Медзитим, писня ми лєгла понеже ми найбаржей идзе шпивац весели и живши писнї, та думам же ше то так поскладало. На змаганю участвовали велї дзивки котри крашнє шпивали, а мнє ше найбаржей пачела Ивана Малїк зоз Коцура и Марина Роман зоз Руского Керестура – визначує Йована.

Кед слово о других активносцох, Йована потераз була успишна и у спорту, як и у школских змаганьох зоз руского и сербского язика. Уж дзевец роки тренира карате, дзе ше ище як мала визначела на велїх змаганьох. Так, участвовала на републичних и покраїнских змаганьох и купох, а пред шейсцома роками освоєла перше место на медзинародним змаганю у Суботици. Окрем на менших змаганьох, Йованов успих у седмей и осмей класи бул перше место на републичним змаганю зоз руского язика, а тиж у седмей и осмей класи завжала други места на републичних змаганьох зоз сербского язика.

Як гвари, успих у школи єй барз важни, та ше прето уписала до ґимназиї, после чого би ше любела уписац на правни факултет. Затераз остава активна на шицких польох як и потераз, гвари Йована.

IMG_9351

 

ПОВЯЗАНИ ТЕКСТИ