РУСКИ КЕРЕСТУР – Вчера медзи 22 и 23 годзин ше запалєл квартель на першим поверху заєднїцкого квартельного будинку у улїци Иву Лоли Рибара у Руским Керестуре. У огню нїхто нє покалїчени, алє цалком згорела єдна простория, а друга барз очкодована.
Перше ше запалєл телевизор и огень ше преширел по квартелю у хторим була його власнїца, дознава Рутенпрес. Гоч го пробовала загашиц, огень ше швидко ширел, а єй ше прейґ тераси удало доволац помоц. Сушедово такой реаґовали, вицагли ю з квартелю и помагали у гашеню огня, покля нє пришло Добродзечне огньогасне дружтво з Керестура и професийна огньогасна єдинка з Кули.
Жителє будинку евакуовани през облаки и тераси, а у тей интервенциї окреме помогнул Иґор Варґа, з чиїм видлїчкаром дзвигана драбина по хторей людзе виходзели.
Огень гашени два-три годзини, а нєшка рано на месце огня були компетентни инспекциї, после чого почало розчисцованє терену.