БЕОҐРАД – Представительох Координациї Националних совитох (НС-ох) националних меншинох вчера у Народней скупштини Републики Сербиї приял предсидатель Одбору за образованє, науку, технолоґийни розвой и информатичне дружтво Муамер Зукорлич, а бешедоване о образованю на язикох меншинох, насампредз о Заключеньох хтори Координация НС-ох принєсла на своєй схадзки у Новим Пазаре у юлию того року, як и о витворйованю правох на образованє на мацеринским язику.
У делеґациї були представителька словацкей националней меншини Светлана Золнян, мадярскей Анико Єрас, горватскей Дарко Сарич Лукендич, ромскей Витомир Михайлович и рускей Мелания Римар, предсидателька Одбору за образованє нашого НС, а на схадзки присуствовали и народни посланїки Томислав Жиґманов, Фатмир Хасани, Либушка Лакатош и Олена Папуґа, котра и орґанизовала приєм при предсидательови скупштинского Одбору Муамерови Зукорличови.
– Привитуюци делеґацию предсидатель Одбору Зукорлич гварел же у тим мандату будземе мац собешеднїка, же будзе на нашим боку и там дзе годзен, будзе уплївовац на ришованє проблемох у образованю на язикох меншинох. За тото цо нам заґарантоване з Уставом, муша ше вєдно, принципиєлно и арґументовано бориц национални совити – гварела за Рутенпрес Меланиї Римар после схадзки.
На схадзки поведзене же проблеми, з даєднима винїмками, за шицки меншини скоро идентични. Мацерински язик ше як обовязни виборни предмет находзи у „ґрупи Ц”, вєдно з другима предметами (народна традиция, одбойка, руки у цесту…), та єдни другим конкурую, а школяр ше шме опредзелїц лєм за єден виборни предмет з тей ґрупи. Прето и на тей схадзки вимагане цо скорей пременїц статус мацеринского язика, гварела Римарова.
– Наглашене же нєобходне формовац самостойни, а нїяк комбиновани ґрупи за ученє мацеринского язика. Тиж вимагане же би ше могло формовац ґрупи гоч приявени и менєй як петнац школяре, як тераз предписане зоз Законом. За отверанє ґрупох за ученє язика з елементами националней култури будзе ше вимагац найменєй осем приявених школярох – гварела предсидателька Одбору за образованє НС Руснацох Мелания Римар, котра вчера була у делеґациї Координациї НС-ох.
– У пририхтованю нових Законох – о основи системи образованя и воспитаня и о националних совитох националних меншинох – национални совити би мали формуловац тото цо у законох треба меняц – гварел предсидатель скупштинского Одбору за образованє Муамер Зукорлич и обецал же Одбор за образованє будзе мац и тематски схадзки о образованю на меншинских язикох. Тиж прилапел предкладанє делеґациї Координациї НС-ох же би ше у Скупштини орґанизовало явне слуханє о стану и проблемох у образованю националних меншинох.
