КОЦУР – Шаховски клуб „Oмладинєц“ у рамикох пиятого кола у Войводянскей лиґи ґрупа Бачка, на домашнїм терену бавел процив ШК „Лайош Сеґи“ зоз Байши и змаганє закончели зоз пораженьом. Резултат бул 3,5 наспрам 2,5 на хасен госцуюцих шахистох.
За „Омладинєц“ наступели Миряна Шолая на першей табли, Дюра Фейса бавел на другей и обидвойо страцели змаганє, Владимир Лазор на трецей бавел нєришено, а на штвартей Споменко Павичевич хтори зазначел побиду. Пията и шеста табла на хторей бавели Ґавра Коларич и Стеван Перич закончена нєришено.
И у тим остатнїм колу у ярнєй часци шахисти „Oмладинцу“ були ослабени аж за штирох своїх стандардних и моцних бавячох, та обчекованя за лєпши резултат анї нє мали. Карло Бала, Никола Тадич, Ґоран Попович и Любомир Турович оправдано одсуствовали зоз того змаганя.
Тоту часц змаганя шахисти коцурского „Oмладинцу“ закончели на седмим месце на таблїчки и, як сами гваря, за дзевец роки кельо су у Войводянскей лиґи, то им найслабша полусезона. На єшень бависко будзе предлужене, и вери ше же у єшеньскей часци змаганя завежню даєдно з висших местох.