На петнац роки уж писал за „Руске слово”

автор аба
1.2k Опатрене

Симеон Шимко Дудаш, парняк Влади Костелника, сучашнїк Штефана Гудака, член здруженя интелектуалцох „Пасарайтов”, рускословец у младосци, алє и скойовец, у 86. року живота пензионерски днї препровадзує у Вуковаре, у власним обисцу допатраюци заградку.

Руснак, чи интелектуалєц, чи параст, вше глєда даяки власни фалаток жеми на котрим посадзи даєдно древко овоци, даєден кореньчок парадичох, шалати, ягоди и малини. Слунечнїк  параст посадзи на гольту лєбо вецей напредай, а интелектуалєц даскельо калапи за птици. Так и Шимко Дудаш посадзел парадичи за обисце, слунечнїк за птици, а дринку на здогадованє же дакеди и таке древо росло по валалских обисцох.

Симеон Шимко Дудаш народзел ше 25. авґуста 1930. року у Бачинцох. Оцец Янко Дудаш (Семанов) и мац Олґа (Сивчова) теди жили у Бачинцох, алє нє длуго. Оцец и мац надумали самостойно ґаздовац. Пошли жедляриц до Петровцох, а вец 1937. року почали правиц хижу у Петровцох, у Долу. Того року Шимко рушел до першей класи основней школи.

Шимка залапела и реформа школства, кед ше зоз 4 класох, школованє предлужело на 6. Було то под час Другей шветовей войни, здогадує ше Шимко. Теди учитель у Петровцох бул Яким Олеяр. Кед Шимко закончел 4. класу, учитель Олеяр пошол до Керестура, а потим до Дюрдьова. Паноцец у Петровцох теди бул Янко Будински Бурян, здогадує ше Шимко.

Кед ходзел до 6. класи, приявел ше за писара до општини, бо нє було кадру прето же старших писарох поволали до войска. О два тижнї, гвари Шимко, пришол за писара и Владо Костелник.

Державне ушоренє после Другей шветовей войни було комунистичне, алє ше робело по „наредзеньох”, а активни млади особи були учленьовани до Союзу комунистичней младежи Югославиї. Так ше случело и зоз Шимком.

Директор ґимназиї у Руским Керестуре теди бул Гавриїл Надь, алє здогадує ше Шимко и професора Яши Бакова, котрого шицки любели. Гвари, бул народни чловек, алє барз образовани, бешедовал 6 чи 7 язики, а бул ґу шицким любезни.

5_Simeon z fameliju

ПЕТНАЦРОЧНИ НОВИНАР У „РУСКИМ СЛОВЕ”

Симеон Дудаш, як и Владо Костелник, уж 1945. року, накеди ше уписали до ґимназиї, понеже мали искуства як писаре, почали робиц як новинаре у „Руским слове” у Керестуре. През цали час школованя робели за „Руске”.

По законченю штвартей класи ґимназиї, такв. нїзшей реалней ґимназиї, покладало ше малу матуру. Потим ше ишло далєй до школи. Но, члени СКОЮ нє могли по своєй дзеки виберац дзе ше буду школовац. Партия их посилала до гевтих школох дзе им требал кадер. Шимков партийски задаток, праве як и Влади Костелника, бул же би пошол на новинарски курс до Беоґраду. Алє Шимкови ше то нє пачело. Тота новинарска школа тирвала лєм єден рок, та роздумовал же то нїяка квалификация, бо о єден час приду школованши, та вон останє без роботи. Шимко ше врацел дому.

Владо Костелник, з котрим бул парняк, алє и пайташ як у школованю так и на роботи у „Руским слове”, пошол на тот курс, а познєйше, як нам познате, ноинарство му постала робота хтору робел цали живот.

Уписал ше до учительскей школи до Осєку, алє нє могол достац змесценє у интернату. Нє почал зоз школованьом. Остал при оцови и мацери котри робели у задруґи, помагал им у роботи, кочияшел, алє то му нє було по дзеки. Жадал дацо вецей. Писал директно до Министерства просвити до Заґребу. Модлєл же би го змесцели до учительскей школи котра ма свой дом, понеже приватни квартель нє може плацицУпутели го до Крижевцох, дзе закончел 2. класу учительскей школи, а директор тей школи там бул Матияшевич зоз Боґдановцох, сушед Петровчаньом. Упознали ше, сприятелєли, та Шимко замодлєл чи би го могол даяк преруциц до Осєку, бо з Крижевцох може дому пойсц лєм раз рочно, през жимски розпуст, а носталґия за родним валалом, родичами, пайташами, прицискала.

Директор порозумел, та уж трецу класу Шимко уписал у Осєку. Змесцел ше до дому, нашол ту Миклошевчаньох, Емейдия и Гудака, алє ознова почежкосци. Уж о два днї, их осемцох поволали же би им поведли же су звишок, же школа нє ма тельо места, та их преруцую до Славонского Броду. Шимкови ше то нє пачело. Нагнївал ше и пошол дому. Уж други раз претарговал школованє.

О даскельо днї бул Кирбай у Миклошевцох. Пошол и Шимко зоз дружтвом. Ишли на бициґлох, попрейґа, прейґ Ґрабова. А там стретнул велїх з хторима ходзел до ґимназиї. През бешеду дознал же ше кажди дзешка школує, лєм вон нїґдзе. Дакус го то потрафело. Подумал – „Ша, озда сом нє найгорши?! Сцем буц учитель и готове!”

Понагляло ше му дому, жадал цо скорей пойсц на школованє. Исте пополадню шеднул на гайзибан у Янковцох и одвезол ше до Славонского Броду.

24-25 dudas u skoli

„ПАСАРАЙТОВ”

Под час школованя, през лєто, школяре з Петровцох змагали ше у фодбалу з домашню екипу. Алє интелиґенция нє мала мено за свою екипу, а домашнї мали. Волали ше „Петровска гвизда”, гвари Шимко, а вони були без мена.

– Єдней нєдзелї шедли зме опрез паноцового обисца на лавки, Йовґен Колбас, Силво Семан, Владо Чакан, и я и радзели зме ше як ше будзе волац тота наша екипа. Жадали зме даяке комичне мено. Нє здогадуєм ше точно хто предложел, алє вибране же ше будземе волац „Пасарайтов”. Силво Дудаш истей хвильки пошол дому и направел плакат же пополадню бави „Гвизда” процив „Пасарайтова”. Шицки пришли видзиц цо то за клуб – приповеда Шимко.

После змаганя, надумали же „Пасарайтов” нє будзе лєм фодбалски клуб, алє постанє мено за мишане дружтво котре ше будзе сходзиц и на танцу. „Пасарайтов” зажил и тирвал роками. Кед була красна хвиля, сходзели ше у школским дворе, лєбо у церковней порти, дзекеди у задружним доме. „Пасарайтов” ше загашел кед ше члени порозходзели, поженєли, поодавали…

МЛАДИ УЧИТЕЛЬ

Школованє Шимко закончел 1951. року. Бул розпоредзени за учителя до Жупанї. Достал простор же би оформел  школу у фабрики цукру. Голи мури нє престрашели младого учителя, успишно виполнєл задлуженє. Мал 85 школярох у штирох класох.

Младого учителя дораз анимировали и же би бавел фодбал за домашнї фодбалски клуб „Ґраничар”. У медзичаше мушел одслужиц воєни рок, а потим ше знова врацел до Жупанї, алє тераз до централней школи, до самого варошу, но до истого спортского клубу. Робел з нїзшима класами, а по потреби и у висших. Як учитель, формовал и бабкарски театер.

Бул активни на шицких подручйох, од спортского, прейґ дружтвеного, до политичного. У тедишнї час було нормалне буц барз активни, а шицко ше робело задармо. Алє була чесц буц припознати од дружтвеней заєднїци и доприношиц заєднїци з полну моцу.

СТРЕТНУЦЕ З УЧИТЕЛЬОМ

У цеку 1954. рок, стретнул ше зоз своїм дакедишнїм учительом. Було то приємне стретнуце за Шимка, а ище векша радосц кед го учитель Олеяр нагварял же би пошол робиц до Дюрдьова. Шимко нє роздумовал вельо. Пачела ше му идея робиц у руским валалє, а ище и з дакедишнїм учительом. Уж 1955. року дал одказ у Жупанї и пошол робиц до Дюрдьова. У Дюрдьове ше затримал 3 роки, а потим ше врацел дому, до Петровцох. У медзичаше ше оженєл (1958. року) з Видосаву Миркович, котра була учителька у Петровцох, а родом з Паучя, при Дякове. Там уж робели Вира и Штефан Гудаково. У Петровцох робел 12 роки. Кед ше утаргли висши класи основней школи у Петровцох, вєдно зоз жену прешли робиц до школи „II Конґрес” у Вуковаре.

Як пошол робиц до Вуковару, так ше и длужносци умножовали, а правел и  хижу. Роботи на шицки боки! Народзели ше дзеци: Весна, Блаженка и Сенка, а Шимко, попри фамелиї и учительскей роботи, бул активни и у Союзу Русинох и Українцох РГ, бул предсидатель КУД „Осиф Костелник”, городского дружтва „Слоґа”,  на даскелїх Лєтнїх школох бул директор за нїзши класи. Нє було мированя, гвари Шимко.

Тераз у пензиї, ґдовец од 1993. року, препровадзує днї коло хижи. Нє ма вецей вельо моци ходзиц, алє ище вше може окопац и повязац парадичи, оплєц траву. Пре хороту, страцел вид на єдним оку, та нє може вельо читац, алє може шицко покус. Дзеци, унучата и праунучата му потїха, а дїдо, попри шицкого цо у живоце прежил, ище вше ма моци, алє и знаня научиц своїх унукох правиц капущанїки, гевти прави, руски, алє и одбавиц партию шаху зоз своїм праунуком.

БУДУЦИ РУСКИ ИНТЕЛЕКТУАЛЦИ

Кед сцигли новинки „Руске слово” у котрих бул конкурс за упис школярох до  ґимназиї у Керестуре, порадзели ше зоз Костелником же ше пойду уписац. Дознали то и други Руснаци, та було досц кандидатох. Миклошевчанє, гвари Шимко, уж були у Керестуре, бо були там як вибеженци пре войну. Там стретли Штефана Гудака, Веру Матисову, Марчу Гикову и других. Дакус запожнєли на упис, алє теди то нє завадзало, прияли их.

ПОВЯЗАНИ ТЕКСТИ