БЕОҐРАД – У Сали „Бранко Чопич” беоґрадского сайму нєшка на 11 и на 12 годзин на 60. Медзинародним сайме кнїжкох буду предствени нови виданя по руски НВУ „Руске слово” и Заводу за културу войводянских Руснацох (ВР). Представянє наших виданьох будзе на штанду АП Войводини, односно Покраїнского секретарияту за културу и явне информованє.
На 11 годзин свойо шейсц виданя – „Руснаци у Вербаше”, „Вини и зради” Штефана Гудака (преложена на українски), „Польодїлска лексика” Александра Мудрия, „Ґерманизми у руским язику” Андреї Медєши и каталоґ „Шицко то оглашки и реклами” – представи Завод за културу ВР.
На Сайме кнїжкох на 12 годзин НВУ „Руске слово” представи тогорочни нови збирки поезиї – „Осце и черешнї” Агнети Бучко Папгаргаї, „Слово Бояна Двокраяна” Владимира Бесерминя, „Вселенска черкотка” Миколи Шанту и „Гришка” Асї Папуґа, як и збирку критикох и приказох „Галов” Ирини Гарди Ковачевич.
„Руске слово” на Сайме представи и поетесу Тамару Хринову, як побиднїцу прешлорочного Фестивалу поезиї младих у Вербаше.
О кнїжкох Заводу и „Руского слова” буду бешедовац їх рецензенти, авторе и редакторе виданьох.
