РУСКИ КЕРЕСТУР – На керестурским теметове вчера, 19. януара, пошвецени памятнїк визначному учительови Петрови Кузмякови (1816–1900), на месце дзе бул одприлики поховани, а потим за учителя одлужена и Панахида.
Панахиду служели керестурски священїки парох о. Михайло Малацко и капеланє о. Владимир Медєши и о. Михайло Шанта, а венци на памятнїк поставели амбасадор України у Сербиї пан Олександер Александрович, директорка керестурскей Школи „Петро Кузмяк” Хелана Пашо Павлович, делеґация места Страняни у Словацкей одкаль бул родом учитель Кузмяк, як и його дальша родзина, Василь Кузмяк зоз Попраду.
Поставянє памятнїка иницировал парох о. Малацко хтори з тей нагоди визначел же голєм на тот способ керестурска парохия жада виправиц здогадованє на визначого учителя. З тей нагоди ше на учителя Кузмяка здогала и директорка Школи хтора ноши його мено, а обидвойо подзековали Амбасади України хтора финансовала поставянє памятнїка.
На тей пригоди попри спомнутих були и представителє Националного совиту Руснацох, Союзу Руснацох Українцох Сербиї, Месней заєднїци Руски Керестур и госци зоз Словацкей.
