РУСКИ КЕРЕСТУР – На схадзки Орґанизацийного одбору Културней манифестациї Костельникова єшень, хтора отримана пияток 9. октобра, у просторийох Дома култури у Руским Керестуре, подробнєйше бешедоване о програми и змистох тей наиходзацей манифестациї, хтора будзе тирвац од 13. по 23. новембер.
Манифестация почнє на пияток, 13. новембра, на 19 годзин, у Дядьовей сали Дома култури, зоз представяньом нових виданьох за старших Новинско-видаветельней установи Руске слово, а потим будзе отримана и промоция музичного албуму под назву Генцаре, автора Владимира Малацка. У рамикох того вечара присутни годни видзиц и виставу младих подобових уметнїкох зоз Руского Керестура.
По традициї, промоция кнїжкох за дзеци будзе отримана и у трох основних школох. Пейц нови виданя буду представени на пондзелок, 16. новембра, у школи у Руским Керестуре, школяром од першей по штварту класу основней школи, потим, стреду 18. новембра будзе и промоция дзецинских кнїжкох у школи у Коцуре, док є у Дюрдьове заказана на пондзелок, 23. новембра.
Пред конєц Костельниковей єшенї будзе отримана и Мултимедиялна манифестация младих Дньовка, хтора запланована за 20. и 21. новембер. Пияток, 20. новембра, дзень пред главну програму, у вечаршим термину, Часопис за младих МАК отрима роботню под назву МАК наживо, у хторей ше будзе знїмац видео-подкаст. Розгварка будзе пошвецена животу и творчей роботи двох руских писательох Юлиянови Надьови и Звонимирови Нярадийови, зоз цильом же би ше їх дїла приблїжело младим ґенерацийом. Шлїдуюцого дня, всоботу, 21. новембра, у Велькей сали Дома култури, будзе отримана 29. Мултимедиялна манифестация младих Дньовка, ау орґанизациї Здруженя гражданох Пакт Рутенорум.
Истого дня, всоботу 21. новембра, у Кули, у орґанизациї РКУД Др Гавриїл Костельник, будзе отримане и традицийне Стретнуце рецитаторох Михайло Зазуляк.
У рамикох тогорочней Костельниковей єшенї буду представени и кнїжки за старших у виданю Рускей матки, як и вечар пошвецени зачатнїкови тей, насампредз, литературней манифестациї, професорови Владимирови Бесерминьови, а датум и точне место отримованя обидвох подїйох ище буду накнадно утвердзени.