ВЕРБАС – На Площи Николи Пашича, штварток 1. октобра вечар, отримани перши предвиберанкови сход „Студентскей лїстини – Студенти победзую”. Вельке число гражданох и жительох зоз других населєних местох вербаскей општини ше позберало у центру Вербасу, дац потримовку представнїком тей лїстини.
Сход почал зоз 16 минутами цихосци зоз чим дата чесц тим котри настрадали при спаднуцу стрехи на Гайзибанскей станїци у Новим Садзе. Перши на бину вишол ношитель „Студентскей лїстини – Студенти победзую” проф. др Илия Срданович, хтори бешедовал о актуалней политичней ситуациї у держави, а вец визначел и ситуацию и проблеми зоз котрима ше зочую жителє Вербасу и вербаскей општини. Срданович визначел плани лїстини котру представя, надпоминаюци же Вербас и Сербия треба же би були и муша буц место дзе важа правила єднаки за шицких, дзе ше почитую закони и предписаня, и поволал шицких же би ше зєдинєли и 25. октобра вишли на виберанки у цо векшим чишлє.
Присутним даскельо слова потим гуторел и ґлумец Тихомир Станич, котри ше тиж находзи на лїстини, а як гварел, за Вербас го вяжу найкрасши памятки зоз дзецинства и младосци.
На концу свойо становиско виказал и член студентскей орґанизациї Глас студентох Вербасу Стеван Вуячич котри шицких здогаднул прецо су ту и прецо їх борба и далєй тирва на улїчки и после скоро два роки од нєщесца у Новим Садзе.
Сход закончени зоз овациями и гласним аплаузом, кричаньом „Студенти победзую”, як и препознатлїву музику котра провадзи студентох и танцом кола през цалу городску площу.
