РУСКИ КЕРЕСТУР – Тогорочна, 33. по шоре Културна манифестация „Костельниковa єшень” будзе отримана у периодзе од 13. по 21. новембер, сообщене зоз Дома култури Руски Керестур хтори орґанизатор тей єдинственей подїї хтора у фокусу ма руску литературу.
Манифестация почнє на пияток, 13. новембра, у Дядьовей сали Дома култури Руски Керестур з промоцию нових руских кнїжкох. Вечар пошвецени зачатнїкови Манифестациї, професорови Владимирови Бесерминьови будзе отримани на соботу, 14. новембра, тиж у Дядьовей сали.
Стретнуце рецитаторох „Михайло Зазуляк” будзе отримане на соботу, 21. новембра, у Кули. Исти вечар, у Велькей сали Дома култури Руски Керестур будзе отримана Мултимедиялна манифестация младих „Дньовка”, а пред тим у просторийох „Дзешатки” будзе отворена вистава „Адреналин”.
Попри змистох за одроснуту публику и младих, на „Костельниковей єшенї” у школох у Руским Керестуре, Коцуре и Дюрдьове буду представени и нови руски кнїжки за дзеци, а термини буду благочасово обявени.