СИВЕЦ – З акустичарским вечаром, у Сивцу нєшка почина Фестивал акустичарскей музики – ФАМУС, а змагательна програма младих авторох будзе отримана на ютре.
Нєшкайши акустичарски вечар задумани як нєобовязна програма – „зогриванє” за ФАМУС-у, а у сали Дому култури почнє на 20 годзин. На нєшкайшей програми участвує и наш кантавтор з Руского Керестура Сашо Палєнкаш, котри на ютре будзе и у фаховим жирию за оценьованє младих музичарох.
ФАМУС зоз своїм наступом на ютре отвори познати акустичарски дует „Влада и Байка”, як и рок-критичар и новинар Петар Янятович, шицки з Беоґраду. Спомнути тиж буду и члени фахового жирия.
Главна програма ФАМУС-у на соботу будзе на 20 г. у сивецким Доме култури, а з власнима композициями участвую коло 10 млади музичаре и ґрупи.