СЕРБИЯ/НОВИ САД – На ютре, 8. новембра, у Сербиї Дзень просвитних роботнїкох, а у рамикох означованя Шветового дня учительох (просвитних роботнїкох, 5. октобра), хтори УНЕСКО запровадзел 1994. року и прилапени є у вецей як 100 державох. Кажда го означує на свой споб, но з єдним цильом – здогаднуц и визначиц значносц роботи просвитного роботнїка, як барз одвичательней за кажде дружтво.
Дзень просвитних роботнїкох у Сербиї ше означує на Митра по юлиянским календаре, як и на нєурядови дзень народзеня Вука Караджича, 8. новембра.
Ютрейши Дзень шицким просвитним роботнїком повинчовал и подпредсидатель Покраїнскей влади и покраїнски секретар за образованє, предписаня, управу и национални меншини-заєднїци Михал Нїлаш.
– Буц просвитни роботнїк, у чиїх рукох ключи будучносци, подрозумює окремну одвичательносц и обовязку. Жадам вам же бисце длуго були на тей драги, вше дошлїдни у претворйованю цильох до стварносци – гвари у винчованки Михал Нїлаш просвитним роботнїком.