КОЦУР – На ютре, 15. юлия, у Коцуре почина Фестивал фолклору Руснацох „Коцурска жатва”, а тирва и на соботу, 16. юлия.
Фестивал ютре почнє з Литературним вечаром у лєтнєй учальнї ОШ „Братство єдинство” (на 21 годзин), на хторим будзе представени кратки (антолоґийни) вибор рускей уметнїцкей поезиї, од єй початкох по нєшка, а програма будзе преткана з музичнима точками. После Литературного вечару опрез Дому култури (коло 22 г.) будзе програма за младих „Тамбуранє”.
На соботу, 16. юлия, на „Коцурскей жатви” будзе отворена вистава народних облєчивох, презентация кнїжки „Облєчиво и танци бачко-сримских Руснацох” и етно-столи. Спомнути провадзаци програми буду у физкултурней сали Основней школи, а почню на 18,30 годзин.
Централна програма Фестивалу на соботу вечар будзе на лєтнєй бини Дому култури, а почнє на 20,30 г. з наступом домашнїх дзецинских фолклорних ансамблох КУД „Жатва” и КУД „Завичајно врело”.
Фестивалска часц почнє на 21 г., а наступя танєчни ансамбли КУД з Коцура, Нового Саду, Нового Орахова и Дюрдьова, за ню и ревиялна часц, у хторей, попри спомнутих КУД-ох, наступи и КПД зоз Шиду и Дом култури Руски Керестур.
Медзи фестивалску и ревиялну часцу програми на „Коцурскей жатви” участвую госци з иножемства – ансамбл „Кечера” зоз Словацкей, а „Коцурска жатва” после соботовей вечаршей програми будзе закончена з традицийним „Торба-балом”.
