НОВИ САД – После успиху, кед за 25 днї прешлого року були розпредати тиражи обидвох сликовнїцох за дзеци „Фарби” и „Родзини”, НВУ „Руске слово” прешлого тижня обявело осемминутну видео анимацию сликовнїци „Фарби”.
Рисовани филм ше находзи на Ют’юб каналу Ruske slovo za dzeci, на тим ЛИНКУ, и то пияте и потераз найбогатше диґиталне авдио-визуалне виданє НВУ „Руске слово”, зробене о своїх моцох и зоз огромну потримовку тима, углавним младих и креативних фаховцох.
Илустрациї и компютерску анимацию направела Аня Гудак, на тексти авторкох Оксани Мудри Недич, Ани Мариї Рац, Кристини Шепински и Наташи Еделински Миколка.
Текст пречитала млада ґлумица Адриана Надь, а звук дизайновал Йован Живкович. Редаторка виданя Мелания Римар, а идейни креатор проєкту директор Установи Борис Варґа.
Видео анимация кнїжки „Фарби” у цалосци по змисту сликовнїци, котрого источашнє провадзи титл. Нєодлуга у плану анимация сликовнїци „Родзини” и других виданьох за дзеци у едициї НВУ „Руске слово” – „Заградка”.
Субскрибуйце змисти за дзеци на Ют’юб каналу Ruske slovo za dzeci.