Нови Сад Европска престолнїца култури 2021. року

автор ртв/сен
931 Опатрене

НОВИ САД – Панел нєзависних експертох вчера у Бриселу преглашели Нови Сад за Европску престолнїцу култури 2021. року, цо перши раз же тоту титулу достава город звонка Европскей униї.

За Европску престолнїцу култури 2021. року Нови Сад преглашени после вчерайшей финалней презентациї кандидатох у Бриселу, а проєкт „Нови Сад 2021“ успишно представела делеґация Нового Саду, у хторей були уметнїки, професоре, урбанисти и кустоси.

– Думам же шерцо каждого Новосадяна полне, прето же шицки вєдно твориме Нови Сад таки яки є, а од тераз цала Европа потвердзує же зме центер култури! До духу Нового Саду уткане вельо труду, идеї, креациї, особни импресиї, хтори направели уметнїцки дїла и конєчно сцигло потвердзенє з найвисшого уровню у Европи. Доставанє титули Европскей престолнїци култури отвера нови, вельки дзвери за дальши розвой Нового Саду и цалей держави, и нє лєм у обласци култури – гварел после преглашеня городоначалнїк Нового Саду Милош Вучевич.

– Титула Европскей престолнїци култури ше нє додзелює за єден рок. Вона тирва 30 роки. Кед ше 2045. року будзе бешедовац о Новим Садзе, будзе визначоване же вон Европска престолнїца култури 2021 – гварел предшедаюци Панелу нєзависних експертох Стив Ґрин на преглашованю побиднїка.

Проєкт „Нови Сад 2021“ обдумани як платформа за розвой културних и креативних потенциялох Городу, змоцньованє институцийох култури и културней партиципациї, обнавянє културного скарбу, розвой културних и креативних индустрийох, децентрализациї и медзисекторского сотруднїцтва.

Европски комесар задлужени за образованє, културу, младеж и спорт Тибор Наврачич гварел же є задовольни же 2021. року Европски город култури будзе зоз жеми кандидата за членство у ЕУ.

– Прешвечени сом же Нови Сад нащивительом з Европи и цалого швета одкриє город и його културу, алє науча ценїц и розличносц културох у Европи и нашо заєднїцки вредносци. Прешвечени сом и же тото припознанє Новому Саду принєше тирваци културни, економски и дружтвени хасен, як цо зме видзели и у других европских престолнїцох култури – гварел Наврачич.

На титули Европскей престолнїци култури 2021. Новому Саду вчера повинчовали и предсидатель Влади Сербиї Александар Вучич и Покраїнскей влади Иґор Мирович.

Попри Нового Саду, у финалу за Европску престолнїцу култури 2021. року бул Герцеґ Нови з Чарней Гори.

1-Prestolnjica-02

ПОВЯЗАНИ ТЕКСТИ