НОВИ САД – Концом прешлого тижня у Городскей хижи отримана промоция моноґрафиї „Нови Сад”, у хторей писмено и фотоґрафски зазначени културни, историйни, привредни живот того городу, його архитектура и визначни жителє.
Моноґрафия обявена на сербским, анґлийским, русийским и нємецким язику, а у нєй обявени тексти 48 авторох и фотоґрафиї вецей як 30 фотоґрафох. Редакторка моноґрафиї „Нови Сад” Дуґа Радованов визначела же авторе дали єдинствену слику Нового Саду, як городу возбудзуюцей и динамичней историї, нєповторююцей традициї и широкей автентичней култури и на тот способ поволали людзох най нащивя город хтори ше находзи медзи першима дзешец найкрасшима дестинациями у Европи.
– Мило ми же у тей винїмково квалитетней фотомоноґрафиї найвецей поваги пошвецене култури, културней историї городу и установом култури, цо ясно указує на значносц того проєкту за кандидатуру Нового Саду за титулу Европскей престолнїци култури 2021. року – гварел член Городскей ради за културу Ваня Вученович.
Моноґрафию видала видавательна хижа „Студио Бечкерек”, з потримовку Городскей управи за културу.