РУСКИ КЕРЕСТУР – Нєшка, 27. юния, на Фестивалу рускей култури „Червена ружа” на 10 годзин будзе отворени Керестурски саям, хтори того року з векшого пошвецени старим ремеслом. Саям будзе на спортских теренох у дворе Школи „Петро Кузямк”.
На 20 годзин на отвореней сцени у дворе Школи будзе Шветочни концерт, на хторим наступи и професийни ансамбл ПУЛС з Пряшова, зоз Словацкей.
Пред госцами, на Шветочним концерту наступи Хор и фолклорни ансамбли домашнього Дому култури, добитнїк Специялней награди на Фестивалу „Най ше нє забудзе” у Дюрдьове – Мишана шпивацка ґрупа КПД „Иван Котляревски” з Бикичу, побиднїк Фестивалу „Мелодиї Руского двору” у Шидзе – Тамбурови оркестер КУД „Петро Кузмяк” з Нового Орахова, а побиднїцки шпиванки з тогорочней „Ружовей заградки” одшпиваю Мирослава Даждиу и Йовґен Надь. На початку нєшкайшей вечаршей програми плановани и привит Фестивалу спред покраїнских и општинских орґанох.
После Шветочного, на 23 годзин будзе и Естрадни концерт, на хторим участвую Цоле (Звонимир Кочиш) и тамбураше „Још ову ноћ” з Нового Саду.
Портал „Руского слова” и Рутенпресу обяви и окремну ґалерию з фотоґрафиями з манифестацийох „Ружи”.