НОВИ САД – З концертом Влатка Стефановского и Мирослава Тадича нєшка, 29. юлия, на 21 годзин у дворе Штредньошколского дому (Николайовска 1) почнє Новосадске музичне лєто, хторе будзе тирвац по 17. авґуст. Як наявели орґнизаторе – Музична младеж Нового Саду, буду участвовац уметнїки зоз Сербиї, Горватскей, Французкей, Белґиї, Голандиї, Зєдинєних америцких державох и Арґентини.
После нєшкайшей програми, идуци музични вечар будзе 5. авґуста, кеди наступи джез-пияниста Матия Дедич зоз свою програму „Матия грає Арсена”, хтора пошвецена його оцови Арсенови Дедичови – єдному з найвизначнєйших горватских и югославянских композиторох, кантавторох, писательох и малярох.
Наступ „Петит Стандарду” 8. авґуста будзе музична интерпретация джез-канону горватскей шпивачки Весни Писарович, а з провадзеньом двох припознатих джез- музичарох – бубняра Джона Беча и басисту Криса Далґрена.
Квартет „Танґо Джез” з Арґентини наступи 12. авґуста, хтори комбинує ритми танґа и джезу, а 15. авґуста публика будзе слухац Трио Ремия Паносяна.
У случаю дижджу, програми буду у Синаґоґи.
Уходнїци за програми Новосадского музичного лєта мож купиц у просторийох Музичней младежи Нового Саду, Католїцка порта 2/2, роботнима днями од 8 до 14 годзин, лєбо по интернету, на сайту www.muzickaomladina.org. На истим сайту мож видзиц и вецей информациї о манифестациї и учашнїкох.