ДЖОНСТАУН (ЗАД) – У городзе Джонстаун у Пенсилваниї, у Зєдинєних Америцких Державох, нєшка, 19. септембра, будзе отримани „Джонстаун славянски фестивал” – стретнуце потомкох шицких слявянских народох, медзи нїма и Русинох, котри до ЗАД, односно спомнутого места и обласци, емиґовали на преходзе 19. и 20. вику.
Як пише портал лем.фм, 1925. року 25 одсто жительох Джонстауну були Славянє котри, прилапююци живот у новей держави, заш лєм нє забували на свойо походзенє, та основали свойо церкви, клуби, здруженя, аж и институциї. Прето и циль того фестивалу же би їх потомки ширшому штредку приказали културу, традицию, етнїчни скарб и историю своїх предкох, односно одклаь походза.
У тим напряме нєшка буду орґанизовани рижни едукативни роботнї, вистави, презентациї славянских ручних роботох, єдлох и друге, а єдно з преподаваньох отрима и снователь Карпаторусинского дружтва, публициста и новинар „The New Rusyn Times” Ричард Кастер. Будзе бешедовац о початкох и походзеню русинскей емиґрациї до ЗАД, односно до обласци Джонстауну.