РУСКИ КЕРЕСТУР – Националне швето Руснацох у Сербиї, котре ше преславює 17. януара, того тижня означене у шицких Подручних канцеларийох Националного совиту Руснацох и других местох дзе жию Руснаци, з пригоднима шветочнима програмами. Централна преслава нєшка будзе отримана у Руским Керестуре.
Шветочносц почнє зоз Архиєрейску благодарну Службу Божу у Катедралней церкви св. о. Миколая на 17 годзин.
У просториї над крипту Катедралней церкви нащивителє годни присуствовац на отвераню вистави „12 пошвецени” и „Керестурски ведути” на 18,30 годзин. То вистава портретох керестурских парохох и малюнкох керестурских уметнїкох котри участвовали на подобових колонийох, а на котрих представени керестурски автентични мотиви. Такой потим, на 19 годзин,у Велькей виронаучней сали будзе понукнути Етно-стол.
Шветочна академия у рамикох Централней преслави почнє на 20 годзин у Велькей сали Дома култури. Очекує ше приход представнїкох українскей и русийскей амбасади, покраїнского секретара за културу, явне информованє и одношеня з вирскима заєднїцами Драґани Милошевич, представительох локалней самоуправи, як и чолнїкох з нашей заєднїци. У програми будзе участвовац домашнї Хор Дома култури Руски Керестур и Катедралней церкви св. Миколая и Национални оркестер, попри солистох и других учашнїкох.
Централна преслава Националного швета нєшка вечар будзе закончена з коктелом за учашнїкох и госцох у Ресторанє „ Червена ружа” на 22 годзин.