Обробок фото-неґативох на склу, як часц очуваня нашого скарбу

автор маф
853 Опатрене

РУСКИ КЕРЕСТУР – Фото-неґативи на склу з ателєу познатих керестурских фотоґрафох – нєшка уж покойних оца и сина Осифа и Йовґена Будинскових (Бруґошових), хтори ше чува на Парохиї у Руским Керестуре, од вчера по 12. юний будзе обрабяц ґрупа фаховцох, на чолє з нашу историчарку Любицу Отич, з Музею Войводини з Нового Саду.

Як за Рутенпрес гварела Отичова, начишлєли коло 600 неґативи, хтори скенираю на специялней апаратури и достаню досц квалитетни знїмки, як портретох, так и рижних подїйох, найскорей з периоду медзи двома войнами и перши децениї по Другей шветовей войни, хтори настали найвироятнєйше у Руским Керестуре.

З помоцу старших жительох Керестура потим пробую идентификовац тоти фотоґрафиї, хтори буду зачувани як диґитализовани, а познєйше и презентовани рускей явносци.

3-Skarb-02

З Отичову на тей роботи робя др Миряна Дєкич и фотоґраф Неделько Маркович, обидвойо з Покраїнского заводу за защиту памятнїкох з Нового Саду, та историчар Саша Сабадош, з Архиву у Зомборе.

Тото подняце, як початок велького проєкту на очуваню руского културного скарбу, потримую Завод за културу войводянских Руснацох и Национални совит Руснацох.

ПОВЯЗАНИ ТЕКСТИ