РУСКИ КЕРЕСТУР – Всоботу, 27. фебруара отримана Рочна скупштина рускокерестурского Добродзечного огньогасного дружтва (ДОД), на хторей члени вибрали нове руководство за период од 2016. по 2020. рок. На сходзе єдногласно прилапене же предсидатель ДОД и надалєй будзе Михайло Рац, його заменїк Борис Штранґар, секретар Владислав Рац, а командир Йоаким Рац.
У Предсидательстве ДОД останє и Блаженка Киш, котра окончує функцию касира, а вибрани ище троме члени Предсидательства – Ярослав Гарди, Елемир Надь и Владимир Гарди. У Надпатраюцим одборе буду Славко Надь, Дюра Виславски и Дюра Чордаш.
Предсидатель ДОД Михайло Рац гварел же у тим року як порядни активносци буду преберанє мирох за защиту од огня, обука огньогасцох и участвованє на змаганьох огньогасцох. Понеже кажди рок маю бриґи з комплетованьом опреми, Рац ше наздава же у тим року буду мац векшу финансийну потримовку, та годни обезпечиц цо вецей потребни елементи значни за порядну роботу, як цо то черева, чижми и подобне.
Окрем прилапйованя звиту о роботи и финансийного звиту за прешли рок, члени прилапели и план роботи и финансийни план за 2016. рок. По финансийним планє ДОД того року будзе розполагац зоз 245 000 динари, цо за 100 000 вецей як влонї.
Попри домашнїх огньогасцох, на Скупштини присуствовали и представителє огньогасних дружтвох з Нового Саду, Петроварадину, Кули, Пиньвиц и Крущичу, як и представителє Месней заєднїци Руски Керестур и керестурских здруженьох гражданох.
