СЕРБИЯ – Нєшка на пол ноци у Сербиї почина предвиберанкова цихосц пред виберанками на републичним, покраїнским и локалним уровню, а тирва по заверанє виберацких местох – по 20 годзин на нєдзелю, 24. априла.
На нєдзелю, 24. априла, гражданє з правом гласа буду гласац за нове зволанє Народней скупштини Републики Сербиї, нове зволанє Скупштини АП Войводини, як и за скупштини општинох и городох у векшини местох у держави.
Гласацке право на позарядових виберанкох за републични парламент маю шейсц милиони 737 808 гражданє уписани до Общого виберацкого списку, а годни гласац на 8 378 гласацких местох.
На гласацке место треба вжац важаци особни документ (леґитимацию, вожацку дозволу, пасош), а препоручене же би ше вжало и поволанку хтору гражданє достали на особни адреси.
За републични парламентарни виберанки Републична виберанкова комисия (РВК) преглашела 20 лїстини, на хторих 3 270 кандидати конкурую за 250 посланїцки мандати.
На виберанкох за Скупштину Войводини гласацке право ма милион 729 201 граждан, а 120 будуци покраїнски посланїки буду вибрани спомедзи кандидатох на 15 лїстинох.
Остатнї виберанки за Скупштину Войводини отримани 6. мая 2012. року, а терашнї, после скоро 30 рокох, буду лєм по пропорцийней системи, як и за републични парламент и локални скупштини.
Републична виберанкова комисия найпознєйше на штварток, 28. априла, у „Службеним глашнїку” обяви резултати виберанкох.