КУЛА – Вчера у Кули почал 57. Републични фестивал аматерских театрох, хтори на сцени Културного центру (КЦ) шветочно отворели предсидателька Скупштини општини Кула Снежана Мркаич и познати беоґрадски ґлумец Раде Марянович, член ансамблу Ателєя 212. На вчерайшим отвераню на вецей заводи наглашене же од 57 рокох тирваня Фестивалу, Кула домашня пейдзешати раз, так же є познати и як „Кулски Фестивал”.
Пред шветочним отвераньом, у Ґелериї кулского Културного центру, у присустве 91-рочного академского маляра Павла Блесича зоз Зомбора, отворена вистава його малюнкох, а на отвераню бешедовали секретар Културно-просвитней заєднїци Општини Кула Сава Прерадович, член Городскей ради Зомбор Неманя Сарач и литературни и подобови критичар зоз Зомбора Давид Кецман Дако.
Шветочносц початку тей найвисшей смотри аматерских театрох у Сербиї предлужена з палєньом Фестивалского огня опрез КЦ, заставу Фестивалу подзвигнул ґлумец-аматер з Крущичу Ранко Шпанєвич, а опрез КЦ рецитовала побиднїца тогорочней Републичней смотри рецитаторох у катеґориї штреднього возросту Владица Кляїч з Червинки.
У конкуренциї за награди участвую 8 представи – з Прокупля, Ґорнього Милановцу, Беоґраду, Смедеревскей Паланки, Старей Пазови, копродукцийна представа аматерох з Боґатичу и Прнявору и аж два представи драмских аматерох з кулскей општини – з Кули и Крущичу. Домашнї з КЦ и отворели змаганє, зоз представу „Любовен писмо” Кости Трифковича, у режиї Драґана Остоїча, а драмски аматере з КУД „Крущич” на пияток, 26. юния, завру змаганє з „Вельку драму” Синиши Ковачевича, у режиї Деяна Цицмиловича.
Шицки представи у сали КЦ Кула починаю на 20 годзин, а на ютре на 18,30 г. у Малей сали будзе войофайтове стретнуце найлєпших рецитаторох з кулскей општини, на хтроим участвую и Мирослав Малацко и Михайло Зазуляк з Руского Керестура, та керестурски музичар Сашо Палєнкаш.
