СЕРБИЯ – Зоз кладзеньом венцох и палєньом швичкох на спомин-плочу и його гробе у Алеї заслужнох гражданох на Новим теметове у Беоґрадзе всоботу. 12. марца, означени 13-роки од забойства тедишнього премиєра Сербиї Зорана Дїндїча.
Члени Влади Сербиї положели венци на спомин-плочу, хтора ше находзи при влади, на месце дзе на премиєра окончени атентат. На теметове ше позберали Дїндїчова фамелия, приятелє, колеґове зоз странки и други политичаре, дзе му зоз кладзеньом венцох и палєньом швичкох дали чесц.
У делеґациї Демократскей странки (ДС) були Наташа Вучкович, Балша Божович, Драґан Шутановац, Душан Петрович, Александра Єрков и други, а на чолє бул предсидатель странки Боян Пайтич.
З нагоди 13 рокох од шмерци Дїндїча, гражданє и члени Либерално-демократскей партиї (ЛДП) и Социялдемократскей странки (СДС) орґанизовали „Шпацир за Зорана“, хтори закончели тиж зоз кладзеньом венцох на його гроб.
По нєшка ше нє дознало политичну позадину забойства, алє за орґанизованє и окончованє атентату осудзени бувши командант специялней полицийней єдинки „Червени беретки“ Милорад Улемек Леґия и його бувши заменїк Звездан Йованович.
