Означує ше 160 роки од народзеня Николи Тесли

автор танюґ/сен
1.1k Опатрене

БЕОҐРАД – У рамикох манифестациї „Тесла днї 2016“ ширцом Сербиї ше означує 160-рочнїцу народзеня єдного з найзначнєйших преноходзачох у историї, а означованє почало вчера, 10. юлия, на його родзени дзень. Предсидатель Сербиї  Томислав Николич вчера у Карадьордьовим парку у Беоґрадзе одкрил Теслов памятнїк, треци у Беоґрадзе.

Цали юлий у 10 варошох буду вистави, експерименти, преподаваня, обиходи и рижни збуваня инспировани з Николом Теслом, а програми мож опатриц на сайту www.teslaways.rs

Никола Тесла народзени 10. юлия 1856. року, а його патенти мали вельку улогу у науково-технолоґийним розвою у 20. вику. Пренашол обрацаюце маґнетне польо, индукцийни мотор, ґенератор и трансформатор, феномен електромаґнетней резонанци и патентовал велї иновациї на хторих заснована сучасна електротехнїка и електронїка.

Зачатнїк є и радио-технїки, бездротовей телеґрафиї, радару и патентовал коло 700 иновациї. З нагоди 110-рочнїци його народзеня, 1956. року, єдинка за меранє високого напону достала його мено, як и єдинка моцносци маґнетного поля.

„Тесла днї“ орґанизує „Кластер драгох култури”, у чиїм составе вецей як 40 институциї култури, туристични орґанизациї и аґенциї, привреднїки и аж шейсц факултети у Сербиї, Словениї и Горватскей.

Манифестация часц рути „Драги Тесли“ през Сербию, хтора облапя Музей Николи Тесли, Беоґрад, Неґотин, дзешец мали стари гидроелектрарнї Електропривреди Сербиї, Музей Йована Йовановича Змая у Сримскей Каменїци, манастир Шишатовец итд.

Родзени дзень Николу Тесли вчера означени и у других державох швета.

ПОВЯЗАНИ ТЕКСТИ