ВЕРБАС – Вербас, односно Кaнцелария за енерґетски менаджмент Општини Вербас, вєдно з трома городами у Сербиї вибрани за партнера у вецеймилионски вредним проєкту Energy cities, хтори запровадзує швайцарска Канцелария за сотруднїцтво у Сербиї. По тей одлуки, општини Вербас припадню 3 милиони 090 000 швайцарски франки за унапредзованє енерґетскей ефикасносци, а постої можлївосц же достанє и додатни 720 000 франки за вибудов будинку Реґионалней енерґетскей канцелариї за Войводину и Сербию. Вербас, як найлєпше оценєта општина, достал найвецей средства.
У рамикох новей стратеґиї сотруднїцтва од 2014-2017. року, швайцарска Канцелария за сотруднїцтво у Сербиї ту будзе финансовац витворйованє єдного нового проєкту, прейґ директного сотруднїцтва з вибранима локалнима самоуправами. Ґлобални циль проєкту то унапредзованє општинскей инфраструктури и капацитетох, хаснованє обновююцих жридлох енерґиї, унапредзованє енерґетскей ефикасносци и подзвигованє свидомосци о значеню тих обласцох. У ширшим смислу, проєкт ма допринєсц злєпшованю животного стандарду, стимуловац економски розвой и допринєсц ґлобалним напруженьом за ублажованє климатских пременкох.
Проєкт Energy cities започати з прелиминарну селекцию шицких општинох у Републики Сербиї, з хторих 43 вошли до вибору за анализу, а вибрани штири – Вербас, Парачин, Крушевац и Ужице, хтори буду уключени до проєкту Energy cities на локалним уровню – за награду за енерґетску ефикасносц, за инвестициї до унапредзованя енерґетскей ефикасносци у явних обєктох и за вибудов капацитетох за дальшу надбудов и усовершованє.