МИКЛОШЕВЦИ – Културна манифестация „Миклошевци 2016”, 31. по шоре, 27. и 28. авґуста отримана у Миклошевцох, у Републики Горватскей.
Всоботу, 27. авґуста, Манифестация почала з промоцию кнїжкох поезиї и виставу малюнкох Владимира Провчия з Матульох при Риєки. Малюнки котри того року виложел приказую рижни файти квеца, а пречитал и даскельо свойо писнї.
У вечаршей програми патраче мали нагоду патриц концерт здружених дружтвох „Дюра Киш” зоз Шиду и „Яким Ґовля” з Миклошевцох. Конферансу водзелу Леся Мудри, а програма закончена так же обидва дружтва вєдно одшпивали шпиванку „Дай нам Боже добри час”.
Внєдзелю, 28. авґуста, положене квеце на памятнїк особом хтори страдали у отечественей войни, а Службу Божу служел домашнї парох о. Яким Симунович. Пополадньова манифестация под назву „Поздрав ровнїни” започала з интонованьом державней гимни РГ и шветочней шпиванки Руснацох у РГ. У вчасних пополадньових годзинох привитани и Славко Пап и Деян Будински. хтори на манифестацию пришли на бициґлох з Руского Керестура.
На манифестациї наступели дзешец културно-уметнїцки дружтва – осем домашнї, по єдно мадярске и горватске. КУД з Петровцох, Миклошевцох и Вуковару представели ше зоз шпиванку и танцом, док други представели свойо хорски секциї лєбо шпивацки ґрупи, а Райовоселци свой оркестер котри водзи Даниєл Грубеня. Конферансу водзели Анамария и Матей Мудри.
Внєдзелю вечар у прогами наволаней „Вечар рускей шпиванки” патраче мали нагоду послухац вецей виводзачох котри одшпивали 17 шпиванки. Конферансу водзели Паула Поточки и Анамария Мудри.
На манифестацию пришли и министер господарства у влади РГ Томислав Паненич. У мено покровителя, Совиту за национални меншини РГ, присутних привитала Рената Тришлер, подпредсидателька Совиту, предсидательку Союзу Русинох РГ Дубравка Рашлянин, член Совиту за национални меншини РГ и тайомнїк Союзу Русинох РГ Звонко Костелникоа, предсидателє и представнїки радох рускей националней меншини зоз Вуковару, Осиєку и Томповцох, представнїки Општини Томповци та Месного одбору Миклошевци, як и домашнї парох о. Яким Симунович. Попри других визначних културних и политичних дїячох, та представнїкох церкви, манифестацию провадзела и делеґация Руснацох зоз Сербиї у котрей були Желько Ковач, предсидатель ВО НСРС, Ивана Дудаш, о. д. директорка Заводу за културу войводянских Руснацох и Йоаким Рац Мими, директор Дому култури Руски Керестур.
Орґанизатор тей манифестациї КУД „Яким Ґовля” з Миклошевцох, покровитель Совит за национални меншини РГ а сопокровителє општина Томповци и Союз Русинох РГ.