ШИД – У Лєтнєй владическей резиденциї пияток, 12. фебруара, отримана схадзка Вивершного одбору винїци „Руски двор” д.о.о., як пририхтованє за Скупштину хтора, як одлучене, будзе 27. фебруара у Руским Керестуре.
На схадзки розпатрени финансийни стан и обовязки за прешли рок, а тиж и план активносцох за 2016. рок.
По словох предсидателя Вивершного одбору д.о.о. Звонка Гнатка, порадзене же членом Скупштини будзе предложене же би ше окончело докапитализованє Дружтва и же би воно було 25 одсто дотерашнїх улогох акционерох. Кед Скупштина прилапи предлог, докапитализованє будзе у шейсцох мешацох по Скупштини.
Гнатко додал и же пре цо лєпше пририхтованє Скупштини, наступних дньох буду отримани схадзки акционерох по реґионалней припадносци (Руски Керестур, Дюрдьов, Шид-Срим), на хторих акционере буду упознати з предкладанями Вивершного одбору.
