КОЦУР – Културно-уметнїцке дружтво „Жатва” зоз Коцура того року орґанизовало „Жатвов ярнї бал” котри отримани всоботу, 7. мая, у Пелетовей сали у Коцуре.
Предсидателька Дружтва Мелания Мали на початку вечара привитала числених госцох и подзековала им же зоз своїм присуством потримали роботу, активносци и закладаня коцурскей „Жатви”.
На „Жатвовим ярнїм балу” було вецей як 150 госцох, а окрем домашнїх були и госцох зоз Вербасу, Нового Саду, Дюрдьова, Руского Керестура и других местох.
За тот вечар орґанизаторе пририхтали и смачну вечеру и богату томболу. Даскельо вреднєйши награди ше видвоєли медзи численима, та так друга по вредносци награда – ЛЦД телевизор, пошла до Дюрдьова, а потим його добитнїца вицагла число за главну награду на томболи – бициґлу, котру достали домашнї.
За добру забаву и музику були задлужени „Коцурски бетяре”, котри ше остарали за веселе розположенє и нєпреривне танцованє шицких присутних госцох до позних годзинох.
