ШИД – У сали Скупштини општини Шид вчера отримана традицийна шветочносц з нагоди преглашованя найлєпших спортистох у шидскей општини за 2015. рок, хтору орґанизовали Спортски союз Општини и „Коперникус РТВ Шид”.
За найуспишнєйшого спортисту у конкуренциї хлопох преглашени бициґлиста Предраґ Томич з МТБ „Єднота”, а за найлєпшу спортистку каякашка Зорана Миланович з ККК „Филип Вишнїч” з Вишнїчева.
За найлєпшу хлопску спортску екипу преглашени Одбойкашски клуб „Шид”, а женску рукометашки ЖРК „Раднички”.
Припознаня додзелєни аж у 16 катеґорийох, а Специялне припознанє достал и ОФК „Бикич”, хтори влонї означел 30 роки постояня. Припознанє на шветочносци приял тренер Славко Дупаль.
Спортистох привитал предсидатель Општини Шид Никола Васич, котри найлєпшим повинчовал за посцигнути резултати, а другим пожадал вецей спортски успихи у тим року, у хторим, як гварел, локална самоуправа за спорт опредзелєла 38 милиони динари.
