Як прешла жатва жита, випатра як же у коцурским хотаре дакус зацихло, алє лєм на перши попатрунок. За правого параста ше зна же кед є нє на полю, вец дома о полю роздумує. Пошвидко ше обчекує тлачидбу сої и слунечнїку, хтори у коцурским хотаре вше популарнєйши у одношеню на жито, алє вшелїяк же польопривреднїки шицки свойо надїї того року покладаю на кукурицу.
Як випатра, кукурица того року добре зродзи. Од парастох дознаваме же, уж од шатви сезона за кукурицу добре почала, а хвиля з яку ше стретаме того року добре уплївує на тоту културу. Дакус дижджу, а вец дакус слунка кукурици барз одвитує, окреме тераз кед є у фази налїваня зарна.
У коцурским хотаре єст надосц кукурици, и подєднак заступени и домашнї, и странски сорти. Шицки вони, так исто, подєднак напредую. Кед така хвиля будзе и далєй и кед тот край нє потрафя пекоти у авґусту, як цо то було влонї, кукурица будзе тота хтора виплаци парастом длуства.
Медзитим, то будзе лєм пре добри урожай, а нє и пре добру цену, на основи податкох зоз продуктней берзи, на хторей цена кукурици од конца юлия по тераз спадла зоз 20 на 17,5 динари без ПДВ-а.